Hamımız satıcıyıq, məsələ nəyi və necə satmağımızdadır..

Korporativ satışın ən sadə yolu

Korporativ satışın ən sadə yolu

 

 

Bu gün uşaqlıqda qonşumuz olmuş, axırıncı dəfə məktəbdə oxuyarkən görüşüb, kəlmə kəsdiyim bir şəxs zəng vurmuşdu. Salfetka istehsalına başlayıb və məhsulunun satışı ilə bağlı məsləhət, dəstək istəyirdi. Deyir hamı deyir ki, ən ucuz qiymət bizdədir, amma nəsə almırlar. Təbii ki, telefonda ona çox da kömək edə bilməzdim. Bəzi sadə həqiqətləri anlatmağa çalışdım.

 

Onlardan birini sizinlə bölüşmək istəyirəm. Fikrimcə bu ən əsasıdır.

 

Bizə böyük vədlər verən korporativ satışlar adi mağaza satışlarından, hətta “ekspeditor” satışlarından ciddi fərlənir. Lakin korporativ satışlarda da uğurun sirri çox sadə həqiqətdən başlayır. Bu sadə həqiqəti anlamadan, onu özün üçün rəhbər tutmadan korporativ müştərilər qazanmaq və davamlı əməkdaşlıqlara nail olmaq mümkün deyil.

 

Hər bir koporativ satış meneceri anlamalıdır ki, o qətiyyən məhsul satmır. Onun gördüyü işin adı müştəri şirkətin problemlərinin həllidir – şirkətin xərclərinin azaldılmasına kömək, gəlirinin artırılmasına nail olmaq, vaxta, enerjiyə və resurslara qənaət etməsinə nail olmaq, riskləri azaldaraq sahibkarın, menecerin narahatlıqlarını aradan qaldırmaq, rəqabətdə önə çıxmasına, özünə yeni müştərilər cəlb etməsinə, daha yaxşı tanınmasına kömək etməkdir.

 

Ofis mebeli satan şirkət ofis mebeli satmır, o qarşı tərəfə işçilərinin daha məhsuldar işləməsinə yardım edir, ofisə gələn potensial müştərilərlə daha asan razılaşmalar bağlamasına, müştərilərinin gözündə nüfuzunun qorunmasına kömək edir.

 

Ofis ləvazimatları təchiz edən şirkət qarşı tərəfin vaxtını daha çox gəlir gətirən işlərə sərf etməsinə, ofis xərclərinin azalmasına, işçilərin daha effektli işləməsinə yardım etməkdir.

 

Marketlərə şirniyyat satan şirkətin işi market sahibinin şirniyyat şöbəsindən daha çox pul qazanmasına, bir qisim insanların da bu marketə üz tutmasına vasilə olmaqdır.

 

İnşaat şirkətlərinə tikinti materialları satan satış adamının işi təchizatçının üzünü rəhbərliyin yanında ağ etmək, evlərin daha asan satılmasına səbəb olmaq, sahibkarı baş ağrılarından və gələcək itgilərdən sığortalamaqdır.

 

Bu siyahını sonsuza qədər uzatmaq olar.

 

Siz özünüz dəqiq müəyyən edin ki, öz müştərinizin hansı problemlərini həll edirsiniz? Ən yaxşısı bunu hazırda işlədiyiniz və sizdən çox razı olan şirkətlərdən soruşun. Onlar daha dəqiq deyəcəklər. Bəzən bizim işimizin qarşı şirkət üçün üzdə görünməyən faydaları olur. Bu faydaları bilmək və şirkətlərə təklif hazırlayarkən, şirkətlərdə görüşlər keçirərkən bu faydalara fokuslanmaq korporativ satışlarda sizə uğur gətirəcək əsas faktordur!

 

İkincisi isə sizin bu müsbət dəyişiklərə necə nail olacağınızı onlara sübutlarla göstərməkdir.