Hamımız satıcıyıq, məsələ nəyi və necə satmağımızdadır..

Böhran vaxtı satış..

Böhran vaxtı satış..

Dostlar!

Vəziyyət bəllidir. Hər bir məhsul 50% (orta hesabla) bahalaşdı. Xarici məhsullar da, yerli məhsullar da. Xarici ona görə ki onları dollarla alıb, gətirib, satırdıq. Yerli ona görə ki bütün xammal xaricdən dollarla alınır.

Müştərilər hamısı narazılıq edir. Hətta sizinlə işləməkdən imtina edənlər də var. Elə müştərilər də var ki, bağlandılar, işlərini dayandırdılar və buna görə də sizdən artıq heç nə alası deyillər. Sözsüz ki alver dəfələrlə zəiflədi.

Belə vəziyyətdə nə etmək olar.

Belə vəziyyətdə bizim 2 əsas işimiz var:

  1. Müştərilərimizi əldə saxlamaq üçün çalışmalıyıq.
  2. Başqalarından qopmuş müştəriləri qazanmalıyıq.

1-ci işimiz satışlarımızın azalmasının qarşısını almaqdan ötrüdür. 2-cisi isə böhrandan öz xeyrimizə yararlanmaq üçün. 2-ci işi yaxşı edənlər üçün böhran hətta inkişaf dövrü ola bilər.

Başlayaq 1-cidən. Vəziyyət belədir ki, müştərilərinizi sizinlə birləşdirən bağlar zəifləyib.

  1. 1. Onlar sizdən narazıdırlar, qiyməti qaldırdığınız üçün. Dərhal bunu bir günah kimi qəbul edin. Deyin ki, bəli biz günahkarıq, yetərincə ehtiyat saxlamamışıq. İndi də məcbur oluruq qiyməti qaldırmağa. Anlayıram ki, sizi də çətin vəziyyətdə qoyuruq. Olmayan günahınızı etiraf etməyiniz onların sizə qarşı olan aqressiyasını xeyli azaldacaq, sizi dürüst partnyor kimi anlamağa çalışacaqlar. Bəzən bu yetərli olur.
  2. Onlar daha ucuz yer axtarırlar. Hətta onların qarşısına belə təkliflər çıxa bilər. Belə vəziyyətdə ən əsası müştəri ilə xoş münasibəti saxlamaqdır. Onlarla konfliktə getmək, sizdən ayrılmaq barədə düşündükləri üçün incimək olmaz. Belə olsa siz onları birdəfəlik itirmiş olarsınız. Krizis vaxtı ən yaxşı mövqe müştərilərinizə öz şirkətinizi deyil, onların xeyirini düşündüyünüzü, onlar üçün çalışdığınızı göstərməkdir. Müştəri deyirsə ki, X firma qiyməti hələ qaldırmayıb, ona bu şansdan yararlanmağı təklif edin. Belə deyə bilərsiniz: Əgər ordan almaqla qabağa düşürsünüzsə bundan istifadə edin. Mən buna çox şad olaram. Sizin işiniz həm də bizim işimizdir. Biz sizə azarkeşlik edirik. Lakin sonra yenə bizə dönün. Biz həmişə sizin qulluğunuzdayıq.

Onsuz da əgər belə fikri varsa krizis vaxtı siz onu heç cür saxlaya bilməzsiniz. Bəllidir ki, qısa müddətdən sonra hamı qiyməti qaldırasıdır. Müştərilərinizlə dostluq — qardaşlıq münasibətinizi saxlamısınızsa o yenə də sizə dönəcək, əmin olun.

2-ci işimiz başqalarının itirdiyi müştəriləri qazanmaqdır. Böhran vaxtı bazardakı bütün potensial müştəriləriniz gecə-gündüz 2 şey barədə düşünürlər – gəlirləri necə saxlasınlar və xərclərini necə azaltsınlar. Buna görə də bekar durmayın, hərəkətə keçin.

  1. Potensial müştəri bazanızı açın və indiyə qədər görüş keçirdiyiniz, lakin sizin müştərilərinizə çevrilməmiş bütün şəxslərə, firmalara zəng vurun. Krizislə bağlı onlara xüsusi təklifinizin olduğunu söyləyin, görüş alın və təklifinizi edin. Əgər 2-3 ay əvvəl onlar sizi dinləmək istəmirdilərsə, başqa yaxın adamı ilə işlədiklərini bəhanə edirdilərsə, indi qənaət edəcəkləri hər manat onlar üçün daha dəyərlidir. Onlara xərclərini azaltmaqda kömək edəcək bütün təklifləri eşitməyə hazırdırlar. Buna görə də telefonu götürün və işə girişin.
  2. Əvvəllər sizin məhsula ehtiyacı olmayan müştərilərin indi sizin məhsula ehtiyacı yarana bilər. Bu barədə düşünün. Tapacaqsınız. Məsələn, əvvəllər asanlıqla satış edən şirkətlər, indi çətinliyə düşüblər və onlara satışlarını artırmağa kömək edəcək yollar axtarırlar. Əvvəllər yalnız xarici malla işləyənlər indi yerli də olsa ucuz məhsul axtarırlar. Və sair və ilaxır. Yəni bir yerdən qapı bağlananda digər yerdən açılır. Sadəcə açıq qapıları axtarıb tapmaq lazımdır.

Böhran vaxtı edə biləcəyiniz ən böyük səhv hərəkətsizlikdir!

Başınızı qaldırın və hərəkətə keçin!